2026 වසරේ රාජ්ය වෙසක් උත්සව නිමිත්තෙන් එළඹෙන මැයි මස 31 වැනි ඉරිදා දිනය විශේෂ රජයේ නිවාඩු දිනයක් ලෙස ප්රකාශයට පත් කර තිබේ. රාජ්ය පරිපාලන, පළාත් සභා හා පළාත් පාලන අමාත්ය ඒ. එච්. එම්. එච්. අබේරත්න මහතා විසින් මීට අදාළ විශේෂ අතිවිශේෂ ගැසට් නිවේදනය නිකුත් කර ඇත.
මෙම තීරණයත් සමඟ මීට පෙර රජයේ නිවාඩු දිනයක් ලෙස වෙන්කර තිබූ මැයි මස 02 වැනිදා (සෙනසුරාදා) දිනට පැවති නිවාඩුව අවලංගු වන අතර, ඒ වෙනුවට මැයි 31 වැනිදා මෙලෙස ආදේශ කර තිබේ.
කැබිනට් මණ්ඩලය විසින් ගන්නා ලද තීරණයකට අනුව මැයි මස 27 වැනිදා සිට ජූනි මස 02 වැනිදා දක්වා කාලය මෙවර ‘වෙසක් සතිය’ ලෙස නිල වශයෙන් ප්රකාශයට පත් කර ඇත. මෙවර රාජ්ය වෙසක් උත්සවයේ නිල වැඩසටහන් මැයි 30 වැනිදාට යෙදී තිබීම හේතුවෙන්, ඊට පසුදින වන මැයි 31 වැනිදා මෙලෙස රජයේ නිවාඩු දිනයක් බවට පත් කිරීමට පියවර ගෙන තිබේ.
බුද්ධශාසන, ආගමික හා සංස්කෘතික කටයුතු අමාත්යාංශය සහ බෞද්ධ කටයුතු දෙපාර්තමේන්තුව සඳහන් කරන්නේ ශ්රී සම්බුද්ධත්ව ජයන්තිය නිමිත්තෙන් මෙවර ජාතික වෙසක් උත්සවය මාතර, තිහගොඩ මිඩෙල්ලවල විහාරස්ථානය කේන්ද්ර කරගනිමින් ජනාධිපති අනුර කුමාර දිසානායක මහතාගේ ප්රධානත්වයෙන් පැවැත්වීමට කටයුතු සූදානම් කර ඇති බවයි.
සමස්ත ලංකා ශාසනාරක්ෂක මණ්ඩලයේ මඟපෙන්වීම යටතේ දිවයින පුරා විසිරී ඇති සියලුම දිස්ත්රික් සහ ප්රාදේශීය ලේකම් කාර්යාල හරහා වෙසක් ආගමික වැඩසටහන් දීපව්යාප්තව සංවිධානය කර ඇත.
මෙවර වෙසක් උත්සව සමය තුළ ප්රතිපත්ති පූජාවන්ට මුල්තැන දෙමින් කටයුතු කරන ලෙස බෞද්ධ කටයුතු කොමසාරිස් ජනරාල්වරයා මහජනතාවගෙන් ඉල්ලා සිටී. එමෙන්ම පරිසර සංරක්ෂණය උදෙසා වෙසක් කලාප සහ තොරණ ආශ්රිතව පොලිතින් සහ ප්ලාස්ටික් භාවිතය අවම කරන ලෙස හෝ සම්පූර්ණයෙන්ම මඟහරින ලෙස සංවිධායකවරුන් වෙත විශේෂ චක්රලේඛ මඟින් උපදෙස් ලබා දී තිබේ.