ඇමරිකානු ජනාධිපති ඩොනල්ඩ් ට්රම්ප් වෙනුවෙන් බීජිං නුවර රතු පලස් එළා සතියක් ගතවීමටත් මත්තෙන්, චීන ජනාධිපති ෂී ජින්පින් සිය සමීපතම ගෝලීය සගයා වන රුසියානු ජනාධිපති ව්ලැඩිමීර් පුටින් උණුසුම් අයුරින් පිළිගැනීමට සූදානම් වේ. ගෝලීය භූ-දේශපාලනික පෙරළීන් හමුවේ බීජිං සහ මොස්කව් අතර පවතින නොබිඳෙන සන්ධානය ලෝකයටම ප්රදර්ශනය කරමින් රුසියානු ජනාධිපතිවරයා නිල රාජ්ය සංචාරයක් (State Visit) සඳහා චීන අගනුවර වෙත ළඟා වීමට නියමිතය.
ට්රම්ප්ගේ ආගමනය සහ පුටින්ගේ සංචාරය
ඇමරිකානු ජනාධිපති ඩොනල්ඩ් ට්රම්ප් සිය චීන සංචාරය නිමා කර දින කිහිපයක් ඇතුළත ව්ලැඩිමීර් පුටින් චීනයට පැමිණීම අහම්බයක් නොවන බව දේශපාලන විශ්ලේෂකයෝ පවසති. චීනය සහ රුසියාව යන දෙපාර්ශවයම මේ වන විට ට්රම්ප් පාලනය යටතේ පවතින ඇමරිකා එක්සත් ජනපදය සමඟ පවතින සබඳතා ඉතා සුක්ෂම ලෙස කළමනාකරණය කරමින් සිටී.
විශේෂයෙන්ම, ගෝලීය තෙල් සැපයුමට දැඩි ලෙස බලපා ඇති ඇමරිකා-ඉරාන ගැටුම පාලනය කිරීමට මැදිහත් වන්නේද නැද්ද යන්න සහ වසර ගණනාවක් තිස්සේ ඇදී යන රුසියානු-යුක්රේන යුද්ධයෙන් වොෂින්ටනයේ අවධානය වෙනතකට යොමු වී ඇති ආකාරය පිළිබඳව නායකයින් දෙපළ මෙහිදී දීර්ඝ වශයෙන් සාකච්ඡා කිරීමට නියමිතය.
තමන් විසින්ම නිර්මාණය කරගත් දරුණු දේශපාලන ගැටුම්වල පැටලී සිටින ලොව බලවතුන් දෙදෙනෙකුට (ට්රම්ප් සහ පුටින්) එකම සතියක් තුළ සත්කාරකත්වය සැපයීම හරහා, චීනය ලෝකයට පෙන්වීමට උත්සාහ කරන්නේ තමන් වඩාත් වගකිවයුතු සහ ඇමරිකාවට විකල්ප වූ “ගෝලීය නායකයෙකු” (Alternative Global Leader) බවයි.
බීජිං සහ මොස්කව් යන අගනුවරවල් දෙකෙහිම පොදු අරමුණ වී ඇත්තේ, සාම්ප්රදායික ඇමරිකානු විදේශ ප්රතිපත්තිය අභියෝගයට ලක් කරමින්, එක්සත් ජනපද බලයෙන් හෝ බටහිර සන්ධාන පද්ධතියෙන් (US-led alliance) තොර “බහු-ධ්රැවීය ලෝක රටාවක්” (Multipolar World) ගොඩනැගීමයි.
පුටින් – ෂී ජින්පින් “ඓතිහාසික මිත්රත්වය”
මෙම සංචාරය ව්ලැඩිමීර් පුටින් ජනාධිපති ධුරයට පත්වීමෙන් පසු චීනයේ නිරත වන 25 වන සංචාරය වීම සුවිශේෂී කරුණකි. දශක දෙකකට අධික කාලයක් තිස්සේ නායකයින් දෙපළ අතර පවතින පෞද්ගලික හිතවත්කම චීන-රුසියානු සබඳතා මෙතරම් ශක්තිමත් වීමට ප්රධානතම හේතුව වී ඇත. පූටින් සහ ෂී ජින්පින් මේ වන විට 40 වතාවකට වඩා වඩා මුහුණට මුහුණ හමුවී සාකච්ඡා පවත්වා තිබේ. මෙය චීන නායකයෙකු බටහිර ලෝකයේ කිසිදු නායකයෙකු සමඟ පවත්වා ඇති හමුවීම් සංඛ්යාවට වඩා බෙහෙවින් වැඩි අගයකි.
ජනාධිපති ඩොනල්ඩ් ට්රම්ප් චීනයෙන් පිටව ගිය වහාම ව්ලැඩිමීර් පුටින් බීජිං වෙත පැමිණීම, වොෂින්ටනයට එල්ල කළ නිහඬ රාජ්යතාන්ත්රික පණිවිඩයකි. තමන්ව හුදෙකලා කිරීමට ඇමරිකාව උත්සාහ කළද, තමන්ට ඕනෑම අවස්ථාවක විශ්වාසය තැබිය හැකි ශක්තිමත් සහ බලවත් සගයන් සිටින බව චීනය මෙන්ම රුසියාව ද මෙයින් සනාථ කර ඇත.