සුප්රකට ‘ස්ටාර් වෝර්ස්’ (Star Wars) චිත්රපට මාලාවේ මුල් කෘති සඳහා හැඟීම්බර ගැඹුරක් සහ ප්රබල කතා වින්යාසයක් එක් කිරීමට දායක වූ, ඔස්කාර් සම්මානලාභී ප්රවීණ චිත්රපට සංස්කාරක මාර්ෂියා ලූකාස් (Marcia Lucas) අභාවප්රාප්ත වී තිබේ. මියයන විට ඇය 80 වැනි වියේ පසුවූවාය.
ඇය කලක් තිස්සේ පිළිකා රෝගයෙන් (metastatic cancer) පෙළෙමින් සිටි අතර, කැලිෆෝනියාවේ රංචෝ මිරාජ් හි පිහිටි ඇයගේ නිවසේදී ළඟම හිතවතුන් මැද අවසන් හුස්ම හෙළූ බව පවුලේ නීතිඥ ඩීඩ්රේ වොන් රොක් මාධ්ය වෙත තහවුරු කර ඇත.
ඇයගේ අභාවය වෙනුවෙන් නිවේදනයක් නිකුත් කරමින් පවුලේ සාමාජිකයන් සඳහන් කළේ, මාර්ෂියා යනු සිනමා ඉතිහාසයේ දැවැන්ත පෙරළියක් කළ, සිනමා සංස්කරණය යන්න නව මානයකට ඔසවා තැබූ සැබෑ කාන්තා පෙරගමන්කාරියක් (trailblazer) වූ බවයි.
මාර්ෂියා ලූකාස් 1977 දී තිරගත වූ මුල්ම ‘ස්ටාර් වෝර්ස්’ (Star Wars: A New Hope) චිත්රපටයේ විශිෂ්ට සංස්කරණය වෙනුවෙන් රිචඩ් චව් සහ පෝල් හර්ෂ් සමඟ එක්ව හොඳම සිනමා සංස්කරණයට හිමි ඇකඩමි (ඔස්කාර්) සම්මානය දිනාගත්තාය.
‘ස්ටාර් වෝර්ස්’ හි නොදුටු වීරවරිය
ඇය ‘ස්ටාර් වෝර්ස්’ නිර්මාණකරු ජෝර්ජ් ලූකාස් සමඟ 1969 සිට 1983 දක්වා විවාහ වී සිටි අතර, චිත්රපටයේ තිරය පිටුපස වූ සාර්ථකත්වයට ඇයගෙන් ලැබුණු දායකත්වය සිනමා ක්ෂේත්රයේ දැඩි ඇගයීමට ලක්ව ඇත. චිත්රපටයේ එන සුප්රකට ‘ඩෙත් ස්ටාර්’ (Death Star) සටන් දර්ශන සඳහා රූගත කර තිබූ අතිවිශාල දර්ශන ප්රමාණය (අඩි 40,000ක පමණ නියමුවන්ගේ දෙබස් දර්ශන) ක්රමවත්ව ගළපා, ප්රේක්ෂකයා ඇදබැඳ ගන්නා සටන් දර්ශනයක් බවට පත්කිරීමේ ගෞරවය හිමිවන්නේ ඇයටය.
මීට අමතරව, චිත්රපටයේ එන සුප්රකට ‘ඔබි-වාන් කෙනෝබි’ (Obi-Wan Kenobi) චරිතය ඩැත් වේඩර් සමඟ පවතින සටනින් මියගොස්, පසුව ලූක් ස්කයිවෝකර්ට ආත්මීය මඟපෙන්වන්නෙකු විය යුතු බවට ජෝර්ජ් ලූකාස්ව එකඟ කරවා ගත්තේ ද ඇය විසිනි.
සිනමා දායකත්වය
1945 දී කැලිෆෝනියාවේ උපන් මාර්ෂියා, චිත්රපට පුස්තකාලයාධිපතිනියක ලෙස තම වෘත්තීය ජීවිතය ආරම්භ කළාය. ඇය ලූකාස්ගේ මුල්කාලීන නිර්මාණ වන THX 1138 සහ American Graffiti (මේ සඳහා ද ඔස්කාර් නිර්දේශයක් ලැබිණි) සඳහා දායක වූවාය. පසුව ඇය සුප්රකට සිනමාකරු මාටින් ස්කොර්සෙසි සමඟ එක්ව Taxi Driver, Alice Doesn’t Live Here Anymore සහ New York, New York වැනි සිනමා කෘති රැසක් සංස්කරණය කිරීමට දායක වූවාය.
ඇය පසුව The Empire Strikes Back (1980) සහ Return of the Jedi (1983) යන ස්ටාර් වෝර්ස් චිත්රපට සඳහා ද සිය දායකත්වය ලබා දුන්නාය. ජෝර්ජ් ලූකාස්ගෙන් වෙන්වීමෙන් පසු ඇය ටොම් රොඩ්රිගස් සමඟ විවාහ වූවාය. ඇය දියණියන් දෙදෙනෙකුගේ (ඇමැන්ඩා සහ ඒමි) මවක් වන අතර මුණුබුරු මිණිබිරියන් තිදෙනෙකුගේ මිත්තණියකි.
ක්ෂේත්රයේ ශෝකය
මාර්ෂියාගේ අභාවය වෙනුවෙන් ලූකාස්ෆිල්ම් (Lucasfilm) ආයතනය සිය බලවත් කණගාටුව පළකර සිටි අතර, ලොව පුරා සිනමා ප්රජාව ඇයගේ වියෝව වෙනුවෙන් ශෝකය පළකර සිටිති.
‘ස්ටාර් වෝර්ස්’ හි ලූක් ස්කයිවෝකර් ලෙස රංගනයෙන් දායක වූ සුප්රකට නළු මාර්ක් හැමිල් (Mark Hamill) සඳහන් කළේ, ඇය දක්ෂ, නව්යකරණයට බර කලාකාරිනියක මෙන්ම සැබවින්ම ඉතා සුහදශීලී, බුද්ධිමත් සහ විනෝදකාමී සමීප මිතුරියක වූ බවයි. ඇයගේ මතකයන් සදාකාලිකව පවතින බව ද ඔහු පවසා තිබේ.