හිටපු අමාත්ය විමල් වීරවංශ මහතාගේ බිරිඳ වන ශෂී වීරවංශ මහත්මියට එරෙහිව පවත්වාගෙන යනු ලබන රාජ්යතාන්ත්රික විදේශ ගමන් බලපත්ර (Diplomatic Passport) නඩුව එළඹෙන ජූලි මස 24 වැනිදා නැවත කැඳවීමට කොළඹ මහේස්ත්රාත් අධිකරණය නියෝග කර තිබේ.
ව්යාජ ලේඛන ඉදිරිපත් කරමින් අවිධිමත් ලෙස මෙම ගමන් බලපත්රය ලබාගත් බවට ඇයට එරෙහිව චෝදනා එල්ල වී ඇති අතර, නඩුව කොළඹ අතිරේක මහේස්ත්රාත් ලියන් වරුසාවිතාන මහතා ඉදිරියේදී කැඳවූ අවස්ථාවේදී දැනට ඇප මත පසුවන ශෂී වීරවංශ මහත්මිය අධිකරණයේ පෙනී සිටියාය.
මීට පෙර පැවති නඩු වාරයකදී විත්ති පාර්ශවය වෙනුවෙන් පෙනී සිටි නීතිඥ බුද්ධික චන්ද්රසේකර මහතා අධිකරණයෙන් ඉල්ලා සිටියේ මෙම නඩුවට අදාළ ඉලෙක්ට්රොනික ලේඛන ජනනය කරන ලද (Computer-generated) පරිගණක පද්ධතිය පරීක්ෂා කිරීමට තමන්ට අවස්ථාව ලබා දෙන ලෙසයි. සාක්ෂි ආඥාපනතේ (Evidence Ordinance) ප්රතිපාදන ප්රකාරව එම දත්ත පද්ධතිය පරික්ෂා කිරීමට අවසර නොලැබුණහොත් සාධාරණ නඩු විභාගයක් පවත්වාගෙන යා නොහැකි බව විත්ති පාර්ශවය තර්ක කළේය.
කෙසේ වෙතත්, අපරාධ පරීක්ෂණ දෙපාර්තමේන්තුව (CID) වෙනුවෙන් පෙනී සිටි නියෝජ්ය සොලිසිටර් ජනරාල්වරයා අද දින අධිකරණයට දන්වා සිටියේ මෙම ලේඛන පරිගණක මගින් සකස් කරන ලද ඒවා නොවන බවයි. ඒවා මුල් ලේඛන ස්කෑන් කර (Scanned) දත්ත ගබඩාවක (Database) තැන්පත් කරන ලද ඒවා බව ඔහු පැහැදිලි කළේය.
විත්ති පාර්ශවයේ ඉල්ලීමට ඉඩකඩ සලසා දීම සඳහා සාක්ෂි (විශේෂ ප්රතිපාදන) පනත යටතේ නිවේදනයක් (Notice) ගොනු කිරීමට කටයුතු කරන බව නියෝජ්ය සොලිසිටර් ජනරාල්වරයා මෙහිදී අධිකරණයට වැඩිදුරටත් දැනුම් දුන්නේය. මේ අතර විත්ති පාර්ශවයේ නීතිඥවරුන් ප්රකාශ කළේ මේ සම්බන්ධයෙන් වන සිය කරුණු දැක්වීම් ඉදිරියේදී මෝසමක් (Motion) මාර්ගයෙන් ඉදිරිපත් කරන බවයි.
දෙපාර්ශවයේම කරුණු සලකා බැලූ අතිරේක මහේස්ත්රාත්වරයා, වැඩිදුර සාක්ෂි විභාග කිරීම සඳහා නඩුව ජූලි 24 වැනිදාට කල් තබන ලෙස නියෝග කළේය.