දැරියන් දෙදෙනෙකු සමූහ දූෂණයට ලක් කිරීමේ වැරදිකරුවන් වූ නව යොවුන් වියේ පසුවන පිරිමි ළමුන් තිදෙනෙකුට බන්ධනාගාර දඬුවම් නියම නොකර නිදහස් කිරීමට බ්රිතාන්ය අධිකරණය ගත් තීරණය, එරට අගමැති ශ්රීමත් කීර් ස්ටාමර් (Sir Keir Starmer) විසින් දැඩි දෝෂදර්ශනයට ලක් කර තිබේ. ඔහු මෙම තීන්දුව හඳුන්වා දී ඇත්තේ “අතිශය කණගාටුදායක සහ පිළිකුල් සහගත” (appalling) ක්රියාවක් ලෙසය.
මෙම බිහිසුණු සිදුවීම වාර්තා වන්නේ එංගලන්තයේ හැම්ප්ෂයර් (Hampshire) ප්රදේශයෙනි. 2024 නොවැම්බර් සහ 2025 ජනවාරි යන මාසවලදී ෆෝඩින්බ්රිජ් (Fordingbridge) හිදී මෙම ප්රහාරයන් සිදුව ඇත. එහිදී එවකට 14 සහ 15 යන වයස්වල පසු වූ දැරියන් දෙදෙනෙකු, මෙම පිරිමි ළමුන් තිදෙනාගේ දරුණු අපයෝජනයට ලක්ව තිබේ. බ්රිතාන්ය ඔටුන්න හිමි නඩු පැවරීමේ සේවාව (CPS) පවසන පරිදි, එක් දැරියකට පිහියක් පෙන්වා තර්ජනය කර, ඇයගේ දුරකථනය සහ පිහිටීම සෙවිය හැකි එයාර්ටැග් (AirTag) උපකරණ වෙළඳසැලක දමා ඒමට බල කර, පසුව පාළු ස්ථානයකට රැගෙන ගොස් මෙම අපරාධය සිදු කර ඇත. වඩාත්ම කණගාටුදායක කරුණ නම්, ඔවුන් මෙම අපරාධය සිය ජංගම දුරකථන මගින් වීඩියෝ කර සමාජ මාධ්ය ඔස්සේ මිතුරන් සමඟ බෙදාගෙන තිබීමයි.
කෙසේ වෙතත්, සවුත්හැම්ප්ටන් ක්රවුන් උසාවියේ (Southampton Crown Court) විනිසුරු නිකලස් රෝලන්ඩ් (Judge Nicholas Rowland) විසින් වැරදිකරුවන්ට සිරදඬුවම් පැමිණවීම වෙනුවට, පුනරුත්ථාපන නියෝග (Youth Rehabilitation Orders) පමණක් නිකුත් කරන ලදී. විනිසුරුවරයා ප්රකාශ කළේ බාලවයස්කාර ළමුන් අනවශ්ය ලෙස අපරාධකරුවන් කිරීමෙන් වැළකී සිටීමට තමන්ට අවශ්ය බවයි. අධිකරණයේදී හෙළි වූ පරිදි මෙම පිරිමි ළමුන් තිදෙනාම විවිධ මානසික සහ සංවර්ධන ඌනතාවලින් පෙළෙන්නන් වේ. ඉන් එක් අයෙකුට ADHD සහ දැඩි කාංසාව (anxiety) පවතින අතර, අනෙක් පිරිමි ළමයාගේ බුද්ධි ඵලය (IQ) ඔහුගේ වයසේ පසුවන්නන්ගෙන් පහළම 1% මට්ටමේ පවතී. තුන්වන පිරිමි ළමයා මෘදු සංජානන ආබාධයකින් (mild cognitive impairment) පෙළෙන බව වෛද්ය වාර්තා පෙන්වා දී තිබේ.
දැනට 16 වැනි වියේ පසුවන එක් වින්දිත දැරියක් බීබීසී (BBC) පුවත් සේවයට ප්රකාශ කළේ, මෙම තීන්දුව තමන්ට “මුහුණට තැබූ ගලකින් ගැසුවාක් මෙන්” දැනුණු බවයි. වැරදිකරුවන් ළමුන් වූ පලියට නීතිය ඉදිරියේ ඔවුන් කළ අපරාධය සැහැල්ලුවට ගෙන ඇති බවත්, මෙය හුදෙක් “අතට තට්ටු කර නිදහස් කිරීමක්” (slap on the wrist) බඳු බවත් ඇය පැවසුවාය.
හිටපු සුරක්ෂිතතා අමාත්ය ජෙස් පිලිප්ස් (Jess Phillips) ද පවසා සිටියේ මෙම තීන්දුව මගින් සමාජයට ඉතා වැරදි පණිවිඩයක් ලැබෙන බවයි. “ඔවුන් මේ අපරාධය කර ඇත්තේ සමාජ මාධ්ය තුළ ප්රසිද්ධ වීමට (raping for content) සහ මිතුරන් අතර පුරසාරම් දෙඩීමටයි,” යැයි ඇය පැවසුවාය. හැම්ප්ෂයර් පොලිස් සහ අපරාධ කොමසාරිස් ඩෝනා ජෝන්ස් (Donna Jones) ද විනිසුරුවරයාගේ තීරණය දැඩි ලෙස විවේචනය කර තිබේ. මීට අමතරව, කොන්සර්වේටිව් පක්ෂයේ නායිකා කෙමී බේඩනොක් (Kemi Badenoch) සහ රිෆෝම් යූකේ (Reform UK) පක්ෂයේ පාර්ලිමේන්තු මන්ත්රී රොබට් ජෙන්රික් (Robert Jenrick) ඇතුළු දේශපාලනඥයන් රැසක් මේ පිළිබඳව සිය කණගාටුව පළ කර ඇත.
අගමැති කීර් ස්ටාමර්, වින්දිත දැරියන් දැක්වූ අසාමාන්ය ධෛර්යය අගය කර ඇති අතර, මෙම දඬුවම් පිළිබඳව නීති නිලධාරීන් වහාම සමාලෝචනයක් ආරම්භ කිරීම නිවැරදි පියවරක් බව අවධාරණය කළේය. ඒ අනුව, බ්රිතාන්ය නීතිපති කාර්යාලය (Attorney General’s Office) විසින් මෙම දඬුවම් “අනවශ්ය ලෙස ලිහිල්” (unduly lenient) ඒවාද යන්න සහ මෙය නැවත අභියාචනාධිකරණය (Court of Appeal) වෙත යොමු කළ යුතුද යන්න පිළිබඳව මේ වන විට දැඩි පරීක්ෂණයක් ආරම්භ කර තිබේ.