ශ්රී ලංකාවේ දුම්රිය ප්රවාහන ක්ෂේත්රයේ යටිතල පහසුකම් සංවර්ධනය කිරීම සහ නවීන තාක්ෂණික ක්රමවේද හඳුන්වා දීම අරමුණු කරගනිමින් ශ්රී ලංකාව සහ රුසියානු සමූහාණ්ඩුව අතර සුවිශේෂී අවබෝධතා ගිවිසුමකට (MoU) අත්සන් තබා ඇත. මෙම ද්විපාර්ශ්වික එකඟතාව හරහා මෙරට දුම්රිය සේවාවේ පවතින තාක්ෂණික ගැටලුවලට තිරසාර විසඳුම් ලැබෙනු ඇතැයි අපේක්ෂා කෙරේ.
මෙම අත්සන් තැබීමේ සඳහා ශ්රී ලංකාව නියෝජනය කරමින් සභාවේ නායක සහ ප්රවාහන, මහාමාර්ග හා නාගරික සංවර්ධන අමාත්ය බිමල් රත්නායක මහතා සහභාගී වූ අතර, රුසියානු පාර්ශ්වය වෙනුවෙන් එරට ප්රවාහන නියෝජ්ය අමාත්ය සහ රාජ්ය ලේකම් දිමිත්රි ස්වෙරෙව් (Dmitry Zverev) මහතා අත්සන් තැබීය. ශ්රී ලංකාවේ දුම්රිය සේවාව වැඩිදියුණු කිරීම සඳහා තාක්ෂණික සහයෝගය ලබා දීම සඳහා මෙම අවබෝධතා ගිවිසුම මගින් රුසියාව සමඟ එකඟතාවයට පැමිණ ඇත.
රුසියාවේ “කසාන්” (Kazan) ජාත්යන්තර ආර්ථික සමුළුව
මෙම තීරණාත්මක ගිවිසුමට අත්සන් තබනු ලැබුවේ රුසියාවේ ටාටාස්ථාන් ප්රාන්තයේ කසාන් (Kazan) නුවරදී පැවැත්වුණු 17 වන ජාත්යන්තර ආර්ථික සමුළුව (XVII International Economic Forum – KazanForum) අතරතුරදීය.
රුසියාව – ඉස්ලාමීය ලෝකය: විශ්වාසය සහ සහයෝගීතාව” යන තේමාව යටතේ පැවැත්වුණු මෙම සමුළුව ගෝලීය වෙළඳාම සහ ආයෝජන ක්ෂේත්රයේ සුවිශේෂී සන්ධිස්ථානයක් ලෙස සැලකේ. රටවල් 103කට අධික සංඛ්යාවක් නියෝජනය කරමින් නියෝජිතයින් මෙම සමුළුව සඳහා සහභාගී වේ.