රථවාහන වැරදි සිදු කර ඇති බවත්, ඒවා CCTV කැමරා පද්ධති හරහා හඳුනාගෙන ඇති බවත් පවසමින් මෝටර් රථ සහ යතුරුපැදි හිමියන් ඉලක්ක කර ගනිමින් ක්රියාත්මක වන නවතම කෙටි පණිවිඩ (SMS) සහ WhatsApp ජාවාරමක් පිළිබඳව වහාම අවදි වන්නැයි ශ්රී ලංකා පොලිසිය මහජනතාවට දැඩි අනතුරු ඇඟවීමක් කරයි.
පොලිස් මාධ්ය කොට්ඨාසය නිවේදනයක් නිකුත් කරමින් කියා සිටින්නේ, විවිධ ව්යාජ දුරකථන අංක භාවිත කරමින් මෙම පණිවිඩ එවනු ලබන අතර, ඒවා බැලූ බැල්මට ශ්රී ලංකා පොලිසිය විසින් නිල වශයෙන් නිකුත් කරන ලද පණිවිඩ සේ පෙනී සිටීමට ජාවාරම්කරුවන් උපක්රමශීලී වී ඇති බවයි.
මෙම වංචනික පණිවිඩ හරහා රියදුරන්ට ලින්ක් එකක් (link) ලබා දෙන අතර, එමඟින් ඔවුන්ව ව්යාජ වෙබ් අඩවියක් වෙත යොමු කෙරේ. එහිදී අදාළ රථවාහන වරද සඳහා දඩ මුදල් ගෙවන ලෙස උපදෙස් ලැබෙන බව පොලිසිය පවසයි.
පොලිසිය වැඩිදුරටත් හෙළිදරව් කරන්නේ, රජයේ නිල මාර්ගගත දඩ මුදල් ගෙවීමේ ද්වාරය වන GovPay (govpay.lk) පද්ධතියට සමාන වන අයුරින්ම මෙම හොර වෙබ් අඩවිය නිර්මාණය කර ඇති බවයි. මේ හේතුවෙන් එම අඩවිය වෙත පිවිස මුදල් ගෙවීමට උත්සාහ කරන පාරිභෝගිකයන්ගේ:
- ක්රෙඩිට්/ඩෙබිට් කාඩ්පත්වල රහස්ය තොරතුරු
- බැංකු ගිණුම් විස්තර
- පුද්ගලික අනන්යතා තොරතුරු (OTP ඇතුළුව)
ජාවාරම්කරුවන් සතු වීමේ දැඩි අවදානමක් පවතින බව ආරක්ෂක අංශ පෙන්වා දෙයි.
රථවාහන දඩ මුදල් මාර්ගගතව (Online) ගෙවීම සඳහා රජය සහ ශ්රී ලංකා පොලිසිය එක්ව ලංකාව පුරාම ක්රියාත්මක වන පරිදි GovPay නිල පද්ධතිය හඳුන්වා දී ඇත. පොලිසිය අවධාරණය කරන්නේ, රථවාහන වරදක් සම්බන්ධයෙන් පොලිස් නිලධාරියෙකු විසින් නිල වශයෙන් දැනුම් දී, GovPay පද්ධතිය හරහා ජනනය කරන ලද නිල දඩ පත්රිකාවක් (Official Fine Slip) ලැබීමෙන් පසුව පමණක් දඩ මුදල් ගෙවීම් සිදු කළ යුතු බවයි.
පොලිස් මාධ්ය කොට්ඨාසය මහජනතාවගෙන් ඉල්ලා සිටින්නේ SMS හෝ WhatsApp මඟින් ලැබෙන කිසිදු සැකකටයුතු ලින්ක් එකක් මත ක්ලික් කිරීමෙන් වළකින ලෙසත්, එවැනි පණිවිඩ ලැබුණහොත් වහාම ඒ පිළිබඳව විමසිලිමත් වන ලෙසත්ය.
තමන් අතින් රථවාහන වරදක් සිදුවී ඇත්දැයි සැකයක් පවතී නම්, රාජ්ය තොරතුරු කේන්ද්රයේ 1919 ක්ෂණික ඇමතුම් අංකය හෝ ළඟම ඇති පොලිස් ස්ථානය අමතා තහවුරු කර ගන්නා ලෙස ද ආරක්ෂක අංශ දැනුම් දෙයි.