බස්නාහිර පළාත් ආණ්ඩුකාර ධුරයට ඉරාන් වික්රමරත්න මහතා පත් කිරීමට යෝජනාවක්!
බස්නාහිර පළාතේ දේශපාලන අධිකාරියේ ප්රධානතම තනතුරක් වන බස්නාහිර පළාත් ආණ්ඩුකාර ධුරය සඳහා හිටපු පාර්ලිමේන්තු මන්ත්රී ඉරාන් වික්රමරත්න මහතා පත් කිරීමට රජයේ අභ්යන්තර අවධානය යොමුව ඇති බව විශ්වාස කටයුතු ආරංචිමාර්ග පවසයි.
වත්මන් බස්නාහිර පළාත් ආණ්ඩුකාර හනීෆ් යූසුෆ් මහතා එම ධුරයෙන් ඉල්ලා අස්වීමට අපේක්ෂාවෙන් පසුවන බව ඊයේ (17) නිල වශයෙන් ජනාධිපතිවරයා වෙත දැනුම් දී තිබේ. ඒ අනුව ඉදිරියේදී පුරප්පාඩු වීමට නියමිත මෙම තනතුර සඳහා ඉරාන් වික්රමරත්න මහතාගේ නම යෝජනා වී ඇති බව වාර්තා වේ.
ක්රිකට් කමිටු පත්වීම සහ ජාත්යන්තර ක්රිකට් කවුන්සිලයේ (ICC) බලපෑම
සමගි ජන බලවේගය නියෝජනය කළ ඉරාන් වික්රමරත්න මහතා මෑතකදී රජය සමඟ එක්වෙමින් ශ්රී ලංකා ක්රිකට් පරිවර්තනීය කමිටුවේ සභාපති ධුරය භාරගත්තේ පසුගිය අප්රේල් 29 වනදාය. කෙසේ වෙතත්, ඔහු සෘජුවම දේශපාලනයට සම්බන්ධ චරිතයක් වීම හේතුවෙන්, මේ වන විට දිවයිනට පැමිණ සිටින ජාත්යන්තර ක්රිකට් කවුන්සිලයේ (ICC) නියෝජිතයින් මෙම පත්වීම පිළිබඳව සිය දැඩි කණස්සල්ල පළකර ඇති බව දේශපාලන ආරංචිමාර්ග සඳහන් කරයි.
අයි.සී.සී. (ICC) නීති රීතිවලට අනුව ඉදිරි මාස තුන ඇතුළත ශ්රී ලංකා ක්රිකට් නිලවරණයක් පැවැත්වීමට නියමිත අතර, පවතින තත්ත්වය හමුවේ ඉරාන් වික්රමරත්න මහතාට එම තනතුරෙන් ඉවත් වීමට සිදුවීමේ අවදානමක් මතුව ඇත.
ආණ්ඩු පක්ෂයෙන් ආ නව යෝජනාව
තමන් නියෝජනය කළ දේශපාලන පක්ෂය ද අතහැර ආණ්ඩුව සමඟ අත්වැල් බැඳගත් ඉරාන් වික්රමරත්න මහතාට සිදුව ඇති මෙම දේශපාලන අර්බුදයට විසඳුමක් ලෙස, ඔහු වෙත හිස්වන බස්නාහිර පළාත් ආණ්ඩුකාර ධුරය පිරිනැමිය යුතු බවට ආණ්ඩු පක්ෂයේ අභ්යන්තරයෙන්ම මේ වන විට යෝජනාවක් ඉදිරිපත් වී තිබේ.