දිවයිනට බලපා ඇති අයහපත් කාලගුණ තත්ත්වය හේතුවෙන් අධිවේගී මාර්ග භාවිත කරන රියදුරන් දැඩි අවධානයෙන් ගමන් කළ යුතු බව මාර්ග සංවර්ධන අධිකාරිය අවධාරණය කර තිබේ. විශේෂයෙන්ම අධික වැසි, මීදුම සහ දෘශ්යතාව අඩුවීම හේතුවෙන් අනතුරු අවදානම ඉහළ යා හැකි බැවින්, රියදුරන් සඳහා විශේෂ ආරක්ෂක උපදෙස් මාලාවක් නිකුත් කර ඇත.
මාර්ග සංවර්ධන අධිකාරිය සඳහන් කරන්නේ, අධිවේගී මාර්ගවල ස්ථාපිත කර ඇති විද්යුත් නාමපුවරු මගින් ලබාදෙන අනතුරු ඇඟවීම් සහ මාර්ග තොරතුරු රියදුරන් අනිවාර්යයෙන්ම අනුගමනය කළ යුතු බවයි. මාර්ගයේ ජලය රැඳී තිබීම සහ ලිස්සන සුළු තත්ත්වයන් හේතුවෙන් අධික වේගයෙන් ධාවනය කිරීම අනතුරුදායක බව ද ඔවුන් පෙන්වා දෙයි.
මාර්ග සංවර්ධන අධිකාරිය විසින් නිකුත් කළ ප්රධාන උපදෙස් අතර, දිවා කාලයේදීත් ප්රධාන ලාම්පු භාවිත කිරීම, වාහන අතර ආරක්ෂිත පරතරයක් පවත්වා ගැනීම සහ හදිසි තිරිංග භාවිතයෙන් වැළකීම විශේෂයෙන් සඳහන් වේ. අධික වර්ෂාව පවතින අවස්ථාවලදී පැයට කිලෝමීටර් 60ක පමණ පාලිත වේගයකින් ධාවනය කිරීම සුදුසු බව ද උපදෙස් ලබා දී ඇත.
මේ අතර, අධිවේගී මාර්ගවල අවම වේග සීමාවද දැඩි ලෙස ක්රියාත්මක කිරීමට පියවර ගෙන ඇති බව වාර්තා වේ. මාර්ගයේ අධික ලෙස මන්දගාමීව ධාවනය කරන වාහන ද අනතුරු අවදානමක් බව පෙන්වා දෙන මාර්ග සංවර්ධන අධිකාරිය, ඒ සම්බන්ධයෙන් නව මාර්ගෝපදේශ සහ නීතිමය ක්රියාමාර්ග ඉදිරියේදී දැඩි කරන බව ද ප්රකාශ කර ඇත.
ශ්රී ලංකාවේ අධිවේගී මාර්ග ජාලය මේ වන විට කිලෝමීටර් 300කට අධික දුරක් ආවරණය කරන අතර, දක්ෂිණ අධිවේගී මාර්ගය, කොළඹ – කටුනායක අධිවේගී මාර්ගය සහ මධ්යම අධිවේගී මාර්ගය ඇතුළු ප්රධාන මාර්ග දිනපතා දහස් ගණනක් වාහන භාවිත කරයි.
මඟින් පෙන්වා දෙන්නේ, අධිවේගී මාර්ග අනතුරු වලින් බොහොමයක් සිදුවන්නේ අධික වේගය, රියදුරු නොසැලකිල්ල සහ අයහපත් කාලගුණයේදී නිසි පාලනයක් නොමැතිව ධාවනය කිරීම හේතුවෙන් බවයි. එබැවින් රියදුරන් සියලු දෙනාම මාර්ග නීති පිළිපදිමින්, අවධානයෙන් සහ ඉවසීමෙන් ගමන් කිරීම අත්යවශ්ය බව බලධාරීන් නැවතත් සිහිපත් කරයි.