රුසියාවේ සිටින හිටපු ලාංකික සෙබළුන් ගැනත් සාකච්ඡා කරයි
රුසියානු සමූහාණ්ඩුවේ නිල සංචාරයක නිරත වන ශ්රී ලංකා ආරක්ෂක ලේකම්, එයාර් වයිස් මාර්ෂල් (විශ්රාමික) සම්පත් තුයියකොන්තා මහතා සහ රුසියානු නියෝජ්ය ආරක්ෂක අමාත්ය වාසීලි ඔස්මාකොව් (Vasily Osmakov) මහතා අතර විශේෂ ද්විපාර්ශ්වික හමුවක් මොස්කව් නුවරදී පවත්වා තිබේ.
මෙම නිල හමුව සිදුවූයේ මොස්කව් නුවරදී පැවැත්වෙන පළමු “ජාත්යන්තර ආරක්ෂක සංසදය” (1st International Forum on Security) සහ “ආරක්ෂක ගැටලු පිළිබඳ උසස් නියෝජිතයන්ගේ වාර්ෂික සමුළුව”ට සමගාමීවය. මැයි 26 වැනිදා සිට 29 වැනිදා දක්වා මෙම ජාත්යන්තර ආරක්ෂක සමුළුව පැවැත්වීමට නියමිතය.
දෙරටේම ආරක්ෂක ප්රධානීන් අතර පැවැති මෙම සුහද සාකච්ඡාවේදී කලාපීය සහ ගෝලීය වශයෙන් මතුවෙමින් පවතින ආරක්ෂක අභියෝග පිළිබඳව දීර්ඝ වශයෙන් අදහස් හුවමාරු කරගෙන ඇත. ශ්රී ලංකාව සහ රුසියාව අතර අන්යෝන්ය වශයෙන් වැදගත් වන ක්ෂේත්ර කිහිපයක් ඔස්සේ සහයෝගීතාව තවදුරටත් ශක්තිමත් කිරීමට මෙහිදී එකඟතාව පළ විය.
විශේෂයෙන්ම පහත සඳහන් කරුණු කෙරෙහි එහිදී වැඩි අවධානයක් යොමු කෙරිණි:
- හමුදා-තාක්ෂණික සහයෝගීතාව: දෙරට අතර ආරක්ෂක තාක්ෂණය සහ මෙවලම් හුවමාරු කරගැනීම.
- ධාරිතා වර්ධනය: ආරක්ෂක අංශවල වෘත්තීය මට්ටම ඉහළ නැංවීම සඳහා වැඩපිළිවෙළවල් ක්රියාත්මක කිරීම.
- පුහුණු වැඩසටහන්: දෙරටේ සන්නද්ධ හමුදාවන් අතර පුහුණු හුවමාරු අවස්ථා තවදුරටත් පුළුල් කිරීම.
මෙම සාකච්ඡාවේදී අවධානය යොමු වූ තවත් සුවිශේෂී කරුණක් වූයේ වත්මන් රුසියානු සමූහාණ්ඩුවේ සේවය කරනු ලබන හිටපු ශ්රී ලාංකික හමුදා නිලධාරීන්ට සහ සෙබළුන්ට අදාළ ගැටලු සහ ඔවුන්ගේ වත්මන් තත්ත්වයන් පිළිබඳවයි. ඒ සම්බන්ධයෙන් ගත හැකි ඉදිරි පියවර සහ ක්රියාමාර්ග පිළිබඳව ද දෙපාර්ශවය අතර අදහස් හුවමාරු වී තිබේ.
මෙම අවස්ථාවට රුසියාවේ ශ්රී ලංකා තානාපතිනි ශෝබිනී ගුණසේකර, තානාපති කාර්යාලයේ චාන්සරි අංශ ප්රධානී/උපදේශක මිහිරාවි දිසානායක සහ ආරක්ෂක උපදේශක එයාර් කොමදෝරු දිනේෂ් කසගාල්ල යන මහත්ම මහත්මීහු ද සහභාගී වූහ.