මුල්ලේරියාව, අංගොඩ ප්රදේශයේ වෙළඳසලක සේවය කරමින් සිටි තම නීත්යානුකූල බිරිඳගේ ශරීරයට පෙට්රල් වත් කර කුරිරු ලෙස ගිනි තබා පළාගිය 41 හැවිරිදි පුද්ගලයෙකුව මුල්ලේරියාව පොලිසිය විසින් අත්අඩංගුවට ගෙන තිබේ. සැකකරු මීගහවත්ත, අංගොඩ ප්රදේශයේ පදිංචි, මීට පෙර කිසිදු අපරාධ වාර්තාවක් නොමැති ත්රීරෝද රථ රියදුරෙකු බව පොලිසිය තහවුරු කරයි.
පසුගිය මැයි 18 වැනිදා සවස 5.30 ට පමණ සැකකරු ත්රීරෝද රථයකින් අදාළ වෙළඳසල අසලට පැමිණ ඇත. එහිදී ඔහු සිය බිරිඳගේ හිසට පෙට්රල් වත් කර ගිනි තබා වහාම ප්රදේශයෙන් පළාගොස් තිබේ.
ප්රහාරයෙන් බරපතළ පිළිස්සුම් තුවාල ලැබූ කාන්තාව වහාම කොළඹ ජාතික රෝහලට ඇතුළත් කර ඇති අතර, ඇය මේ වන විටත් දැඩි සත්කාර ඒකකයේ (ICU) අසාධ්ය තත්ත්වයෙන් පසුවෙයි. වෛද්ය වාර්තාවලට අනුව ඇයගේ මුහුණ සහ පපුව ප්රදේශයට දැඩි හානි සිදුව ඇතත්, මේ වන විට ඇයගෙන් මූලික ප්රකාශයක් (කටඋත්තරයක්) ලබා ගැනීමට පොලිස් නිලධාරීන් සමත්ව තිබේ.
සිද්ධියෙන් පසු මුල්ලේරියාව පොලිස් බලප්රදේශයේදී සැකකරුව අත්අඩංගුවට ගත් අතර, ප්රහාරය එල්ල කර පළායන ආකාරය අසල තිබූ CCTV කැමරාවලද සටහන්ව තිබුණි. සැකකරුගෙන් කරන ලද ප්රශ්න කිරීම් මත අපරාධය සඳහා භාවිතා කළ ත්රීරෝද රථය සහ පෙට්රල් බෝතලය පොලිස් භාරයට ගෙන ඇත.
පොලිසිය හමුවේ පාපොච්චාරණය කරමින් සැකකරු පවසා ඇත්තේ තම බිරිඳ නිවසින් බැහැරව වෙනත් පුද්ගලයන් ඇසුරු කරන බවට වූ දැඩි සැකය සහ පවුල් ආරවුල් හේතුවෙන් මෙය සිදුකළ බවයි. එමෙන්ම ඇයට ගිනි තැබීමෙන් පසු තමාද සියදිවි නසා ගැනීමට සැලසුම් කර තිබූ බව ඔහු ප්රකාශ කර ඇත. මෙම යුවළ දෙදෙනාම තම පෙර විවාහයන්ගෙන් නීත්යානුකූලව වෙන්වීමෙන් පසු එකිනෙකා විවාහ කරගෙන ඇති බවද අනාවරණය වී තිබේ.
සැකකරු අද (මැයි 24) අලුත්කඩේ අංක 08 මහේස්ත්රාත් අධිකරණය වෙත ඉදිරිපත් කිරීමට නියමිතව තිබුණි.