මීළඟ මට්ටමට ක්රීඩා සංචාරක කර්මාන්තය:
ශ්රී ලංකාවේ ක්රීඩා සංචාරක ක්ෂේත්රයේ නව පෙරළියක් සනිටුහන් කරමින්, ජාත්යන්තර ප්රමිතියෙන් යුත් නව පාපන්දු ක්රීඩාංගණයක් ඉදිකිරීම සඳහා ජාත්යන්තර පාපන්දු සම්මේලනයේ (FIFA) මූල්ය හා තාක්ෂණික සහාය ශ්රී ලංකාවට හිමිවන බව විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා ප්රකාශ කළේය.
අමාත්යවරයා මේ බව අනාවරණය කළේ කොළඹ කොටුව, යෝර්ක් වීදියේ පිහිටි ඓතිහාසික ග්රෑන්ඩ් ඔරියන්ටල් හෝටලය (GOH) ඉදිරිපිටදී “FIFA ලෝක කුසලාන ප්රේක්ෂක කලාපය – 2026” (FIFA World Cup Fan Zone 2026) නිල වශයෙන් විවෘත කිරීමේ සමාරම්භක උත්සවයට පසුගියදා (11) එක්වෙමිනි.
මීගමුවෙන් තේරූ ‘කඩොල්කැලේ’ බිම
පසුගිය වසරේ FIFA උප සභාපතිවරයා මෙරට සිදුකළ නිල සංචාරයේදී ඇතිකරගත් එකඟතාවකට අනුව මෙම ව්යාපෘතිය ක්රියාත්මක වේ. මේ සඳහා ශ්රී ලංකා ආයෝජන මණ්ඩලයට (BOI) අයත් මීගමුව කඩොල්කැලේ ක්රීඩාංගණ භූමිය තෝරාගෙන ඇති අතර, එහි මූලික නෛතික හා පරිපාලනමය කටයුතු මේ වන විටත් ආරම්භ කර ඇති බව අමාත්යවරයා මෙහිදී තහවුරු කළේය.
මෙම නව ක්රීඩාංගණය ස්ථාපිත කිරීමත් සමඟ ශ්රී ලංකාවට ජාත්යන්තර පාපන්දු තරගාවලි සත්කාරකත්වය දැරීමට අවස්ථාව උදාවන අතර, එය මීගමුව සහ ඒ අවට ප්රදේශවල සංචාරක ව්යාපාරයේ දැවැන්ත පිම්මකට හේතු වනු ඇතැයි අපේක්ෂා කෙරේ.
සංචාරක ක්ෂේත්රයේ නව පිබිදීම
ක්රිකට් ක්රීඩාව මෙන්ම පාපන්දු ක්රීඩාව ද මෙරට සංචාරක ක්ෂේත්රය ජාත්යන්තර මට්ටමට ඔසවා තැබීමට ඇති විභවය අමාත්යවරයා මෙහිදී පෙන්වා දුන්නේය. විවිධ ගෝලීය අර්බුද මධ්යයේ වුවද, ශ්රී ලංකාවේ සුවිශේෂී ආගන්තුක සත්කාරය සහ උරුමයන් හේතුවෙන් විදේශීය සංචාරකයන් විශාල වශයෙන් මෙරටට පැමිණෙන බවත්, මැයි 31 වන විට මෙරටට පැමිණි සමස්ත සංචාරකයන් සංඛ්යාව මිලියනය (ලක්ෂ 10) ඉක්මවා ගොස් ඇති බවත් ඔහු සඳහන් කළේය.
| සංචාරක ක්ෂේත්රයේ ප්රගතිය (මැයි 31 වන විට) |
| පැමිණි සමස්ත සංචාරකයන්: මිලියන 1 කට අධිකයි |
| නව ඉලක්කය: පාපන්දු හරහා ක්රීඩා සංචාරක (Sports Tourism) ක්ෂේත්රය ප්රවර්ධනය |
ග්රෑන්ඩ් ඔරියන්ටල් හෝටලයට නව පෙනුමක්
1837 තරම් ඈත ඉතිහාසයකට උරුමකම් කියන, වර්තමානයේ ලංකා බැංකුවට අයත් ග්රෑන්ඩ් ඔරියන්ටල් හෝටලයේ (GOH) ඇති ඓතිහාසික වටිනාකම අගය කළ අමාත්ය විජිත හේරත් මහතා, එය නවීන ජාත්යන්තර ප්රමිතීන්ට අනුකූලව සංවර්ධනය කිරීම සඳහා කැබිනට් මණ්ඩලය දැනටමත් තීරණය කර ඇති බව ප්රකාශ කළේය.
“කොළඹ සහ තදාසන්න ප්රදේශවල වෙසෙන සියලුම පාපන්දු ලෝලීන්ට මම විවෘතව ආරාධනා කරනවා ඉදිරි දිනවලදී මේ Fan Zone එකට පැමිණ, ලෝක කුසලාන තරග සජීවීව නරඹන ගමන් කාර්යබහුල ජීවිතයට පොඩි විවේකයක් එකතු කරගන්න කියලා.”
— ඇමැති විජිත හේරත්
‘York Street Live’ කණ්ඩායම සහ ග්රෑන්ඩ් ඔරියන්ටල් හෝටල් කළමනාකාරිත්වය එක්ව සංවිධානය කළ මෙම සුවිශේෂී අවස්ථාවට සහභාගී වූ අමාත්යවරයා ඇතුළු පිරිස එහිදී සජීවීව පාපන්දු තරග නැරඹීමට ද එක්වූහ.