රාජකීය සමාව හිමිවෙයි; නමුත් දේශපාලන තහනම එලෙසමයි
කාම්බෝජයේ රාජද්රෝහී චෝදනාවට ලක්ව වසර 27ක සිරදඬුවමක් විඳිමින් සිටි හිටපු ප්රමුඛ විපක්ෂ නායක කෙම් සොඛා (Kem Sokha) වෙත රාජකීය සමාව (Royal Pardon) හිමිව තිබේ. කාම්බෝජයේ රජු වන නොරොදොම් සිහාමෝනි (King Norodom Sihamoni) වෛද්ය ප්රතිකාර සඳහා විදේශගතව සිටින බැවින්, එරට වැඩබලන රාජ්ය නායකයා මෙන්ම සෙනෙට් සභාවේ සභාපතිවරයා ද වන හිටපු අගමැති හුන් සෙන් (Hun Sen) විසින් මෙම සමාව දීමේ නියෝගයට අත්සන් තබා ඇත.
වත්මන් අග්රාමාත්ය හුන් මානෙට් (Hun Manet) ප්රකාශ කළේ මෙම පියවර ජාතික සමගිය සහ සංහිඳියාව ශක්තිමත් කිරීම උදෙසා ගත් එකක් බවයි. කෙසේ වෙතත්, මෙම සමාව දීම අදාළ වන්නේ ඔහුගේ සිරදඬුවමට පමණක් වන අතර, අධිකරණය විසින් පනවා ඇති වසර පහක විදේශගත වීමේ තහනම සහ දේශපාලන කටයුතුවල නිරත වීමේ ජීවිතාන්තය දක්වා වූ තහනම තවදුරටත් ක්රියාත්මක වන බව ඔහුගේ නීතිඥවරු තහවුරු කරති.
72 හැවිරිදි කෙම් සොඛා, කාම්බෝජයේ ප්රධානතම විපක්ෂය වූ ‘කාම්බෝජ ජාතික මුදාගැනීමේ පක්ෂයේ’ (CNRP) සම-නිර්මාතෘවරයා වේ. 2013 මහ මැතිවරණයේදී හුන් සෙන්ගේ පාලක පක්ෂයට (CPP) දැඩි අභියෝගයක් එල්ල කිරීමට මෙම පක්ෂය සමත් විය. පසුව 2017 වසරේදී, අමෙරිකානු ප්රජාතන්ත්රවාදී කණ්ඩායම්වලින් සහය ලබාගත් බවට පැවසෙන වීඩියෝවක් මුල් කරගනිමින් ඔහුව අත්අඩංගුවට ගත් අතර, 2023 වසරේදී ඔහු වැරදිකරු වී නිවාස අඩස්සියට පත් කෙරුණි. පසුගිය අප්රේල් මස අවසානයේදී ඔහුගේ ඇපෑල ද අධිකරණය විසින් ප්රතික්ෂේප කරන ලදී.
මානව හිමිකම් සංවිධාන පවසන්නේ මෙම නඩු විභාගය සම්පූර්ණයෙන්ම දේශපාලන අරමුණු මත සිදු වූවක් බවයි. හියුමන් රයිට්ස් වොච් (Human Rights Watch) සංවිධානයේ ආසියානු කලාපීය අධ්යක්ෂ ඊලේන් පියර්සන් (Elaine Pearson) ප්රකාශ කළේ, මෙම සමාව දීම මගින් සිදු වූ අසාධාරණය යම් තාක් දුරකට සමනය වුවද, සොඛාට පනවා ඇති දේශපාලන සහ ගමන් බාධා මෙන්ම කාම්බෝජයේ සෙසු විපක්ෂ ක්රියාකාරීන්ට එල්ල වන තර්ජන තවමත් පහව ගොස් නොමැති බවයි.